فطائر عجينة الفيلو الرقيقة باللحم المفروم والجبن
joodi joodi
المقادير
- باكيت عجينة الفيلو الرقيقة
- مقادير الحشوة :
- 0.5 كغ لحم مفروم ناعم
- 3 حبات فليفلة الوان مقطعة قطع صغيرة
- 2 بصلة كبيرة مقطعة الى مكعبات صغيرة
- 1 بندورة مقطعة قطع صغيرة
- حسب الرغبة ملح
- حسب الرغبة فلفل اسود
- رشة قرفة صغيرة
- معلقة دبس رمان
- معلقتين سمنة للحشوة
- 10 شرائح طولية من جبنة القشقوان
- 4 معالق زبدة لدهن رقائق الفيلو (كمية الزبدة على حسب كمية الرقائق)
- 1 بيضة
- كاسة وربع حليب سائل
طريقة التحضير
- بندبل البصل الناعم مع السمنة لحتى يدبل تماما وبنضيف عليه اللحم المفروم
- بحرك وبنضيف الملح والفلفل والقرفة ودبس الرمان وبنحرك لحتى تستوي اللحمة
- بنضيف مكعبات الفليفلة الالوان وبنحرك حتى تستوي الفليفلة بس ماتكون دايبة يعني لازم تقرش شوي وبعدها بنضيف مكعبات البندورة عليهم وبنحرك دقيقتين وبنطفي تحت النار
- بنجيب صينينة بايركس او تيفال وبندهنها بالزبدة منيح
- بنحط اول طبقة من رقائق الفيلو جوات الصينية وبندهن وشها كلو بالزبدة
- بعدين بنضيف طبقة تانية وبندهن وشها بالزبدة
- بعدين بنضيف كل طبقتين من عجينة رقائق الفيلو سوى وبندهن وشها بالزبدة لحتى يصير عنا تقريبا 10 طبقات من رقائق الفيلو جوات الصينينة
- بعدها بنضيف الحشوة وهي اللحمة المفرومة مع الفليفلة والبصل والبندورة وبنفردها على كامل الصينية
- بعدين بنضيف شرائح الجبن القشقوان او اي نوع جبنة بتحبوه انا استخدمت القشقوان وبنحطو فوق طبقة اللحمة المفرومة
- بعدين بنرجع بنحط طبقات الفيلو تقريبا 10 طبقات وكل طبقتين فيلو بنحطهم سوى وبندهن الوش بالزبدة الدايبة وبنكرر وضع طبقات الفيلو لتخلص الكمية ال10 طبقات ولاننسى دهن الطبقات بالزبدة الدايبة
- واخر طبقة بندهنها زبدة وبنقطع العجينة جوات الصينينة بالسكين على شكل مستطيلات او مربعات او اي شكل بتحبوه
- واخر شي بنخلط بيضة منيح مع رشة ملح وفلفل وبنضيف عليها كاسة وربع حليب سائل وبنحطهم على صينية الرقائق وبنتركها ترتاح 5 دقائق لحتى يتشرب العجين الحليب والبيض وضرروي تنترك 5 دقائق قبل لتدخل الفرن
- بندخلها الفرن بدرجة حرارة 180 على الرف الوسط وبنتركها لمدة ربع ساعة او تلت ساعة بس ومن فوق بنحمرها شغلة 3 دقايق ازا كان الفرن تبعك حامي او 5 دقائق المهم تاخد لون الاحمرار وبتتقدم مع سلطة اللبن والخيار صحة وهنا
ليست هناك تعليقات:
إرسال تعليق